Storia di Caldonazzo

Riccardo Gasperi ( el Ricardèla ) 1951

👉 Invia i tuoi racconti e testimonianze sulla storia di Caldonazzo

Caldonazzo chi él che ‘l sa

quanti ani che ‘l me gh’a?

Forsi, forsi quattromila:

de sicur l’é ‘na gran fila.

De i Lunari ‘ntra la giàra

i à trovà ‘na gran manàra,

vecia e grisa come i cuchi

(pò i l’à persa da baùchi…)

Chi ere’l mai che à doprà

‘sta manara a quel’età?

Zerto l’è che quela zénte

– e no ‘l digo, no, per gnénte! –

l’era istessa che a Vicenza

(così, almanco, dis la meza);

e con quei de Sant’Antoni

sen parenti propi boni:

veneti sen, e taliani

fin dai tempi pù lontani.

Pò é vegnù la zente etrusca,

quela scura, grassa e brusca,

che parlava da gran siora

e no i capiva ‘na malora.

Po’ è vegnù a piantarse i pali

anca quei che i ciama i Gali,

anca quei che i ciama i Reti:

anca lori, da poreti,

i è vegnùi fra ste montagne

a portar le so magagne,

a piantar le so casote

su e zo per le Rivote,

a robarse ‘n ci’ de tera

man a man che, ‘nte la guera

tra ‘l gran lago e ‘l vecio Zenta,

se sugava ‘l lago e ‘l Brenta.

. . . . . . . . . . . . . . . . . . . .

A compir la confusion

de ‘ste popolazion

dopo vén, mandai da Roma,

quei che vinze e quei che doma,

che ne porta ‘l so dialeto

che nel mezo de quel gheto

fa orden co la spada,

fa orden co ‘na strada

che se ciama Claudia Augusta

che va, come ‘na zusta,

su pei monti e zo ‘nte ‘l pian,

su dal Borgo a Zivezàn.

. . . . . . . . . . . . . . . . . . . .

Ma, a tirar ‘n pressa i fili,

ve dirò che dopo ‘l mili

se gh’aveva tre padroni:

pù vizin gh’era i Siconi,

e pò ‘l Vescovo de Trento

e, lontan da zénto a zénto,

‘n Germania e ancor pù ‘nfòr

gh’era ‘l gran imperador.

. . . . . . . . . . . . . . . . . . . .

‘L era tempi de miseria

che, a parlar de zénte seria,

nadi iè come i padroni

che avén bù, cativi o boni:

vòi dir Vescovi e Francesi,

Tirolesi e Bavaresi

e quel gran Napoleon,

che de tuto ‘l feva ‘n bocòn.

E’ nà anca ‘l Checo Bepe,

per le bòte e per le crepe

de do guere de tormento

per Trieste e ‘nsema Trento:

quela col sior del Vascèl

l’èi finida sul pù bèl;

l’altra, quindese e disdoto,

l’è sta propri ‘n terremoto:

ché sta zénte, ‘mpressa ‘mpressa,

senza gnanca sentir messa,

l’à ciapà le so valise,

le so straze vece e slise,

l’èi scampada via lontan:

zo e zo ‘nfin a Milan,

fòr e fòr per ‘l Todesco,

a patìr la fame e ‘l fresco,

‘n su e ‘n su ‘nsin ai Moràvi

che però i è stadi bravi.

Cò sta zénte l’èi tornada

s’èla forsi desperada

a trovàr ‘l so paese

tuto busi, crèpe e sfése?

La petà lì de pianzocàr,

la sa messa a laoràr

de cemento legno e preda,

e, pù presto che se creda,

le so cà l’à tirà su,

e no l’èi scampada pù.

No, no l’èi scampada gnanca

‘nte ‘l quarantazinque, gnanca

nò perchè gh’era ‘l canon

e ‘l secondo rebaltòn

L’èi finida la me storia

che vo dita senza boria,

ma con gran sodisfaziòn

che vegnù sia l’ocasiòn

de parlar de la me zénte;

e de farghe bén presente

che se tanto l’à patì

foravia e dentro chì,

e, se pur ‘n tanto ragio,

la sa fato si coragio,

nata l’èi de bona scorza;

e, se ‘l fià no ‘l ghe se smorza

vinzerà tute le lote

soporterà tute le bòte.

Chè de bote e de batòste

ogni età gh’à pien le coste:

ma l’augurio che ne fén

e ‘l saludo che ne dén

l’è pò questo: che i balossi

de sti tempi stracaossi,

senza paze e senza bèzi,

pien de ciacere e de screzi,

pù che ‘n pressa i passia via!

E così sia!!!

Riccardo Gasperi